बातमी कट्टा:- मुंबई आग्रा राष्ट्रीय महामार्ग क्रमांक तीनवर भीषण अपघात झाला असून अपघातात २ वर्षीय चिमुकलीचा जागीच मृत्यू झाला तर चिमुकल्या मुलीची आई गंभीर जखमी झाल्याची घटना आज दि ११ रोजी रात्रीच्या सुमारास घडली.बिजासन मातेचे दर्शन घेऊन मोटरसायकलीने परतांना रस्त्यावर खड्ड्यामुळे हा अपघात घडला आहे.
मिळालेल्या प्राथमिक माहितीनुसार चोपडा येथील मनोज शिंदे हे आपल्या पत्नी हेमांगी मनोज शिंदे व दोन वर्षीय मुलगी नेहल मनोज शिंदे यांच्यासोबत मोटरसायकलीने बिजासन माता मंदीरावर दर्शनासाठी गेले होते.सायंकाळी दर्शन घेऊन परत येत असतांनाच मुंबई आग्रा राष्ट्रीय महामार्ग क्रमांक तीनवरील पळासनेर गावाजवळ असलेल्या खड्ड्यात मनोज शिंदे यांची मोटरसायकल पडल्याने हेमांगी शिंदे आणि मुलगी नेहल शिंदे रस्त्यावर कोसळले. यादरम्यान मागून येणाऱ्या अज्ञात भरधाव वाहनाने नेहल शिंदे आणि हेमांगी शिंदे यांना चिरडल्याने यात नेहलचा जागीच मृत्यू झाला तर हेमांगी शिंदेंच्या दोन्ही पायांवरुन वाहन गेल्याने हेमांगी शिंदे गंभीर जखमी झाले आहेत.घटनेची माहिती मिळताच मृत्यूंजयदूत लकी जयदेव आणि सांगवी पोलिस स्टेशनचे पोलिस कर्मचारी घटनास्थळी दाखल होत मदतकार्य करण्यात आले. रुग्णवाहीकेच्या मदतीने पती पत्नीसह मुलीला शिरपूर उपजिल्हा रुग्णालयात रवाना करण्यात आले.यावेळी मनोज शिंदे यांनी एकच आक्रोश केला.
रस्त्यावरील खड्ड्यांमुळे हा अपघात झाला आहे.यापूर्वी देखील खड्ड्यांमुळे याठिकाणी अनेकदा अपघात घडले आहेत.खड्यांमुळे अनेकांनी आपला जिव गमावला असतांना मात्र टोल प्रशासन मुग गिळून गप्प बसले आहे.खड्यांमुळे आणखी किती लोकांचा अपघात होऊन जिव जाण्याची वाट बघत बसले टोल प्रशासन ? असा प्रश्न येथील जनता उपस्थित करत आहे.
