बातमी कट्टा:- मुंबई-आग्रा राष्ट्रीय महामार्गावर 70 पेक्षा जास्त प्रवाशांनी भरलेली ट्रॅव्हल्स तोल गेल्याने पलटी झाल्याची घटना आज सकाळच्या सुमारास घडली आहे. सुदैवाने यात जिवीतहानी टळली असून एका मुलीच्या हाताला दुखापत झाल्याची घटना घडली आहे.
मिळालेल्या प्राथमिक माहिती नुसार पुण्याहून उत्तरप्रदेश कडे जाणाऱ्या 55 एटी 1893 क्रमांकाच्या खाजगी ट्रॅव्हल्सचा मुंबई आग्रा राष्ट्रीय महामार्ग क्रमांक तीनवरील नरडाणा गावापासून काही अंतरावर तोल गेल्याने अपघात झाल्याची घटना आज दि 13 रोजी सकाळी 9 वाजेच्या सुमारास घडली आहे.ट्रॅव्हल्स मध्ये 70 पेक्षा जास्त प्रवासी असल्याची माहिती मिळाली असुन घटनेची माहिती प्राप्त होताच घटनास्थळी नरडाणा पोलीसांसह नागरिकांनी धाव घेत मदतकार्य सुरु केले.
ट्रॅव्हल्स मधील प्रवासींना तात्काळ बाहेर काढण्यात आले.सुदैवाने या अपघातात जिवीत हानी टळली असून एका मुलीच्या हाताला गंभीर दुखापत झाली तर १५-२० प्रवासी किरकोळ जखमी झाले आहेत.घटनास्थळी महामार्ग पोलीसांकडून देखील मदतकार्य सुरु आहे.
प्रवासींचा सामान मोठ्या प्रमाणात ट्रॅव्हल्सच्या वर ठेवण्यात आल्याने ट्रॅव्हल्सने झोल घेत पलटल्याने घटना घडली असल्याचे प्रथमदर्शनी नागरिकांकडून व्यक्त करण्यात येत आहे.
