बातमी कट्टा:- मनिपुर येथील सीमेभागात गोळीबारात जखमी झालेले आणि उपचार दरम्यान वीरमरण आलेले जवान निलेश महाजन यांच्यावर साश्रू नयनांनी धुळे जिल्ह्यातील सोनगीर येथे अंत्यसंस्कार करण्यात आले.यावेळी मोठ्या प्रमाणात जनसमुदाय उपस्थित होता.
शहीद जवान निलेश महाजन यांच्यावर शासकीय इतमामात अंत्यसंस्कार पार पडले.यावेळी सोनगीर गावांमध्ये प्रत्येक घरासमोर रांगोळी काढून निलेश यांना आदरांजली वाहण्यात आली.गावातून निलेश महाजन यांच्या पार्थिवाचे जागोजागी औक्षण आणि पुष्पवृष्टी करण्यात आली.भारत माता की जय, वंदे मातरम, नीलेश महाजन अमर रहे या घोषणांनी संपूर्ण परिसर दणाणून गेला होता.सुट्टीवर आले सैनिकही निलेश यांना अभिवादन देण्यासाठी याठिकाणी आले होते. आजी-माजी सैनिक, प्रशासकीय अधिकारी,आमदार जयकुमार रावल आणि विविध लोकप्रतिनिधी यांच्या उपस्थितीत हा अंतिमसंस्कार झाला.यावेळी 21 फैरी हवेत झाडून निलेश महाजन यांना मानवंदना देण्यात आली.जवान निलेश महाजन यांचे वडील भारतीय सैन्यात होते त्यांचे काका देशासाठी शहीद झाले होते आता निलेश महाजन यानी देशसेवेत प्राण अर्पण केले आहे. अंत्यविधीसाठी प्रचंड जनसमुदाय उपस्थित होता.
