बातमी कट्टा:- मोटरसायकलींच्या भीषण अपघातात 32 वर्षीय व्यक्तीचा मृत्यू तर तीन जण जखमी झाल्याची घटना आज दि 8 रोजी सकाळी 10:30 वाजेच्या सुमारास घडली आहे. जखमींना उपचारासाठी रुग्णालयात दाखल करण्यात आले आहे.
मिळालेल्या प्राथमिक माहिती नुसार आज सकाळी 10:30 वाजेच्या सुमारास शिंदखेडा तालुक्यातील देवी येथील विशाल चंद्रकांत गिरी वय 32 हे निमगुळ येथून दोंडाईचाकडे एम.एच 18 जे 9617 क्रमांकाच्या बुलेटने जात असतांना समोरून एम.एच 39 एस 8712 क्रमांकाच्या हिरो स्लेनडर या मोटरसायकलीने सुदाम विठ्ठल सदाराव वय 50,रवींद्र काळु ठाकरे वय 40,हिरालाल सुकलाल चव्हाण वय 40 हे दोंडाईचा कडून निमगुळच्या दिशेने जात असतांना दोन्ही मोटरसायकलींची समोरासमोर धडक होऊन भीषण अपघात घडला.घटनेची माहिती मिळताच घटनास्थळी नागरिकांनी धाव घेत मदतकार्य सुरु केले सर्वांना उपचारासाठी रुग्णालयात दाखव करण्यात आले.या अपघातात विशाल गिरी यांच्या डोक्याला गंभीर दुखापत झाल्याने मोठ्या प्रमाणात रक्तश्राव झाला होता.रुग्णालयात तपासणी दरम्यान डॉक्टरांनी विशाल गिरी यास मृत घोषित केले.
