बातमी कट्टा:- भरधाव वेगाने जाणाऱ्या ऊसाच्या ट्रकने मोटरसायकलीला धडक देत दोन सख्या भावांना चिरडल्याची घटना काल दि 24 रोजी दुपारी घडली आहे. याबाबत ट्रक चालका विरुध्द गुन्हा दाखल करण्यात आला आहे.
साक्री तालुक्यातील मालांगज येथील किशोर बापू सोनवणे आणि त्यांचे भाऊ संजय बापू सोनवणे हे बारामती येथे कामाला आहेत.ते कोर्टाच्या कामानिमित्त बारामती येथून आपल्या गावी मालांगज येथे आले होते.काल दि 24 रोजी किशोर सोनवणे आणि संजय सोनवणे दोन्ही बंधू एम.एच.18 ए.बी.1832 क्रमांकाच्या मोटरसायकलीने बारामती जाण्यासाठी निघाले होते.दुपारी पिंपळनेर रस्त्यावरील पिंपळनेर जवळील सप्तशृंगी पेट्रोल पंपाजवळ दुपारी 3 वाजेच्या सुमारास ऊसाने भरलेला एम.एच 04 बी.जी 5686 क्रमांकाच्या ट्रकने मोटरसायकलीला धडक दिली.या अपघातात भरधाव ट्रकने संजय सोनवणे व किशोर सोनवणे या दोन्ही सख्या बंधूंना चिरडल्याने त्यांचा जागीच मृत्यू झाला.याबाबत पिंपळनेर पोलीस स्टेशनात ट्रक चालक विरुध्द गुन्हा दाखल करण्यात आला आहे.
