बातमी कट्टा:- ठेकेदाराकडून 10 टक्के प्रमाणे 40 हजारांची लाच स्विकारुन मोटरसायकलीने पसार झालेल्या ग्रामपंचायत अधिकारीच्या धुळे लाचलुचपत प्रतिबंधक विभागाने मुसक्या आवळल्या आहेत. याप्रकरणी गुन्हा दाखल करण्यात आला आहे.
तक्रारदार हे शासकीय बांधकाम ठेकेदार असून त्यांनी महाराष्ट्र शासनाच्या दलित वस्ती सुधार अंतर्गत पारोळा तालुक्यातील मोजे तामसवाडी ग्रामपंचायतचे रस्ता कॉंक्रिटीकरणाचे पाच लक्ष किमतीचे काम घेऊन पूर्ण केले होते. सदर झालेल्या कामाचे चार लाखाचे बिलाचा चेक तामसवाडीचे ग्रामपंचायत अधिकारी दिनेश वासुदेव साळुंखे रा.भालेराव नगर, कॉटन मार्केटच्या मागे, अमळनेर, जि. जळगाव यांनी तक्रारदार यांना अदा करून सदरची रक्कम तक्रारदार यांच्या बँक खात्यात जमा झाली होती. त्यानंतर तक्रारदार व त्यांचे चुलत काका असे तक्रारदार यांनी घेतलेल्या दुसऱ्या कामाची चौकशी करण्याकरिता सुमारे 07 दिवसांपूर्वी तामसवाडी ग्रामपंचायत कार्यालयात गेले असता तेथे ग्रामपंचायत अधिकारी दिनेश वासुदेव साळुंखे यांनी तक्रारदार यांच्याकडे त्यांना अदा केलेल्या बिलाच्या रकमेच्या 10 टक्के प्रमाणे 40 हजार रुपये लाचेची मागणी केल्याने तक्रारदार यांनी दूरध्वनी द्वारे माहिती दिली होती.
सदर माहितीवरून ला.प्र.वि. धुळे पथकाने पारोळा येथे जाऊन तक्रारदार यांची भेट घेऊन त्यांची तक्रार नोंदवून घेतली होती. सदर तक्रारीची दि. 19.मे रोजी पडताळणी केली असता ग्रामपंचायत अधिकारी दिनेश वासुदेव साळुंखे यांनी तक्रारदार यांच्याकडे 40 हजार रुपये लाचेची मागणी करून सदर लाचेची रक्कम अंमळनेर येथे दगडी दरवाजा समोर राजे संभाजी चौकात स्वतः स्वीकारून दुचाकी वर पळून गेले होते. त्यानंतर त्यांचा शोध घेऊन त्यांना ताब्यात घेण्यात आले असून त्यांचे विरुद्ध अमळनेर पोलीस स्टेशन येथे भ.प्र.अधिनियम कलमाने गुन्हा दाखल करण्याचे काम सुरू आहे. सदरची कारवाई श्रीमती शर्मिष्ठा घारगे-वालावलकर पोलीस अधीक्षक, ला.प्र.वि, नाशिक परीक्षेत्र,नाशिक यांच्या मार्गदर्शनाखाली सापळा पर्यवेक्षण अधिकारी श्री सचिन साळूंखे पोलीस उपअधीक्षक, ला.प्र.विभाग.धुळे,सापळा व तपासी अधिकारी रूपाली रा. खांडवी,पोलीस निरीक्षक ला.प्र. विभाग, धुळे,सापळा पथक- पो.हवा. राजन कदम, पो. कॉ. प्रशांत बागुल सर्व नेमणूक ला.प्र.वि. धुळे युनिट आदींनी केली आहे.
